L-MCESD Jiddiskuti l-Impatt tal-Intelliġenza Artifiċjali fuq in-Negozji u s-Suq tax-Xogħol f'Malta

L-MCESD Jaqbel Li Jiġi Kummissjonat Studju Dwar l-Impatt tal-Intelliġenza Artifiċjali fuq in-Negozji u s-Suq tax-Xogħol f’pajjiżna.

Fl-aħħar laqgħa tal-MCESD, il-Kunsill laħaq qbil biex jiġi kummissjonat studju nazzjonali li janalizza l-opportunitajiet u l-isfidi li l-Intelliġenza Artifiċjali (AI) qed toħloq għall-ekonomija Maltija u għas-suq tax-xogħol.

Din l-inizjattiva saret fuq proposta tas-Segretarju Parlamentari għad-Djalogu Soċjali, Andy Ellul, u tirrifletti l-irwol ċentrali tal-MCESD bħala l-pjattaforma nazzjonali fejn isiru diskussjonijiet strateġiċi dwar il-futur ekonomiku u soċjali tal-pajjiż.

Il-Kunsill fakkar li l-AI mhijiex biss teknoloġija li qed tidħol fil-proċessi tan-negozji, iżda fattur li jifforma politika u strateġija fit-tul. Għalhekk l-MCESD jisħaq li jinvesti f’riċerka bbażata fuq evidenza, sabiex il-pajjiż ikun ippreparat b’mod serju u realistiku għall-bidliet li ġejjin.

Dr Ellul spjega kif dan il-fattur qed jespandi f’kull settur tax-xogħol u li dan l-istudju hu parti minn sforz kontinwu sabiex jiġi evalwat kif l-AI mhux biss jimpatta s-suq tax-xogħol f’pajjiżna iżda anke l-pajjiż b’mod ġenerali.

Fakkar kif l-AI jista’ jkun ta’ pilastru importanti fil-viżjoni fit-tul tal-Gvern, fl-introduzzjoni ta’ remote working aktar mifrux u anke r-Right to Disconnect, li huma parti żgħira minn sett akbar ta’ miżuri intiżi li jsaħħu l-bilanċ bejn ix-xogħol u l-ħajja personali.

Is-Segretarju Parlamentari Ellul faħħar id-diskussjoni produttiva li seħħet fl-MCESD u nnota l-attiviżmu tal-imsieħba soċjali u d-djalogu kostruttiv li tqajjem. Qal li l-Gvern f’dan kollu għandu rwol kruċjali, dak li jqajjem diskussjoni dwar suġġetti bħal dawn u li jaffettwaw direttament ħajjet in-nies u l-ħaddiema, u li wieħed jista’ jaqbel jew ma jaqbilx magħhom, iżda li huma importanti li jiġu diskussi.

L-imsieħba soċjali permezz tal-interventi tagħhom, irrikonoxxew il-fatt li l-Intelliġenza Artifiċjali ser tipprovdi kemm opportunitajiet imma wkoll sfidi għall-ekonomija u s-suq tax-xogħol Malti. Kien hemm qbil li bħala pajjiż, irridu nkunu preparati għall-bidla li ser isir f’diversi setturi tax-xogħol, u li għaldaqstant, irridu nistudjaw it-tibdil li ser ikun qiegħed iseħħ.

L-imsieħba saħqu wkoll li l-intelliġenza artifiċjali kapaċi ssaħħaħ il-produttività u l-effiċjenza, madanakollu huma qalu wkoll li ser iġġib magħha tħassib ġdid, speċjalment fejn jidħlu l-algorithms, u anke l-iskills gaps; b’dawn tal-aħħar jaffettwaw l-iżjed lil ħaddiema aktar kbar fl-età. L-imsieħba saħqu li fuq livell edukattiv l-istudenti għandhom ikomplu jkunu esposti għal għodda diġitali, filwaqt li jkunu mgħallma kif jaħsbu b’mod kritiku, sabiex b’hekk, Malta tibqa’ kompetittiva u reżiljenti waqt li l-bidla teknoloġika tkompli sseħħ.