L-MCESD Jospita Laqgħa tal-Kunsill mas-Sur Glenn Micallef, in-Nominat ta’ Malta għall-Kummissarju Ewropew.
Qabel il-laqgħa, l-MCESD osserva minuta ta’ silenzju b’tifkira tal-memorja tas-Sur Lorenzo Vella, l-eks kap tar-Rappreżentanza tal-Kummissjoni Ewropea f’Malta.
Fl-aħħar laqgħa tal-MCESD, l-Imsieħba Soċjali laqgħu lis-Sur Glenn Micallef, in-nominat ta’ Malta għall-Kummissarju Ewropew. L-Imsieħba Soċjali tkelmu dwar din in-nomina b’mod pożittiv u awgurawlu għall-passi li jmiss. L-Imsieħba Soċjali ħerqana li jikkollaboraw bis-sħieħ permezz tal-MCESD fl-aħjar interess ta’ Malta.
Rappreżentanti mir-Rappreżentanza Maltija għall-Kummissjoni Ewropea taw preżentazzjoni lill-Kunsill u ddiskutew il-linji gwida politiċi tal-Kummissjoni Ewropea li se tibda tiffunzjona għas-snin 2024-2029, immexxija mill-President Ursula von der Leyen. Enfasi ewlenija tal-Kummissjoni l-ġdida hija t-tisħiħ tad-djalogu soċjali. Ir-Rappreżentanza Maltija saħqet li l-involviment attiv tal-Imsieħba Soċjali huwa kruċjali f’dan il-perjodu kritiku, partikolarment fid-diskussjoni u l-implimentazzjoni tal-leġiżlazzjoni waqt il-fażijiet inizjali.
L-Imsieħba Soċjali tal-MCESD iddiskutew b’mod attiv u għamlu r-rakkomandazzjonijiet tagħhom lill-Kummissarju nominat. Huma enfasizzaw il-ħtieġa li jikkollaboraw b’mod aktar effiċjenti biex il-politiki tal-UE jiġu diskussi mill-bidu. Dan isir permezz ta’ kollaborazzjoni sħiħa mill-qrib mal-Kummissarju l-ġdid u l-korpi istituzzjonali tal-UE. L-Imsieħba Soċjali esprimew l-impenn tagħhom li jikkontribwixxu b’mod attiv għall-inizjattivi tal-UE fis-setturi tal-ekonomija ħadra u blu, filwaqt li rrikonoxxew dawn bħala oqsma kritiċi għall-iżvilupp sostenibbli, it-tkabbir ekonomiku, u l-kompetittività ta’ pajjiżna.
Waqt il-laqgħa tal-MCESD, l-Imsieħba Soċjali enfasizzaw sfidi relatati ma’ influwenza effettiva u f’waqtha fuq il-politiki tal-UE hekk kif jiżviluppaw. Ġiet enfasizzata l-importanza ta’ komunikazzjoni u kollaborazzjoni kontinwa mal-Kummissarju l-ġdid, ġaladarbà din tkun ikkonfermata. Huma taw l-isbaħ xewqat lill-Kummissarju nominat u esprimew l-impenn tagħhom li jikkollaboraw b’mod estensiv permezz tal-MCESD fl-aħjar interess ta’ Malta.
Ritratti:
