Fost il-proposti diskussi kien hemm miżuri biex jitnaqqas il-konsum tal-enerġija, spazji pubbliċi bid-dell u ċentri fejn in-nies jistgħu jistkennu mis-sħana, kampanji ta’ għarfien, u aktar ħdura u miżuri biex tittaffa s-sħana fiż-żoni urbani. Dawn ġew segwiti minn proposti għat-tisħiħ tal-infrastruttura tal-enerġija u tal-ilma, ġestjoni aktar flessibbli tad-domanda għall-elettriku, u ppjanar urban li jsaħħaħ ir-reżiljenza klimatika. Ġew ippreżentati wkoll miżuri għat-tħejjija tas-servizzi tas-saħħa għal mewġiet ta’ sħana u avvenimenti estremi, it-tisħiħ tal-infrastruttura tat-toroq u tat-trasport, il-kontinwità tal-provvista u s-sigurtà tal-ikel, u appoġġ immirat lejn anzjani li jgħixu waħedhom.

Iċ-Chairperson tal-MCESD, Maria Micallef, enfasizzat tliet prijoritajiet ewlenin: ippjanar effettiv u tħejjija minn qabel, edukazzjoni mmirata lejn etajiet differenti tas-soċjetà, u protezzjoni tal-ħaddiema u tas-soċjetà b’mod ġenerali. Saħqet li dawn huma essenzjali biex il-pajjiż ikun aktar preparat u reżiljenti quddiem l-isfidi klimatiċi.

Min-naħa tagħha, l-Kap Eżekuttiv tal-Climate Action Authority Abigail Cutajar spjegat li l-laqgħa mal-imsieħba soċjali kellha l-għan li tikkonsolida sett ta’ proposti biex jitressqu lill-Gvern, bil-ħsieb li tissaħħaħ ir-reżiljenza tal-pajjiż u jitħejjew aħjar id-diversi setturi.

Il-kontribuzzjonijiet se jiġu kkunsidrati fl-iżvilupp tal-Pjan Nazzjonali għar-Reżiljenza Klimatika, filwaqt li l-Awtorità se tippreżenta Green Paper wara l-konsolidazzjoni tal-proposti mill-MCESD.

Ritratti:

The post L-MCESD jiddiskuti t-tisħiħ tar-reżiljenza klimatika ta’ Malta appeared first on MCESD.

Il-kollaborazzjoni tiftaħ opportunitajiet għal studji u analiżi dwar is-suq tax-xogħol, il-produttività, il-politika soċjali, is-sostenibbiltà, id-demografija u l-iżvilupp reġjonali, inkluż Għawdex. Il-ftehim jipprevedi wkoll il-kontribut ta’ rappreżentanti tal-Università f’diskussjonijiet rilevanti tal-Kunsill u djalogu strateġiku annwali dwar ir-riċerka, il-ħiliet, l-innovazzjoni u x-xejriet ekonomiċi u soċjali emerġenti.

Permezz ta’ din is-sħubija, iż-żewġ istituzzjonijiet se jesploraw opportunitajiet għal taħriġ, seminars, workshops u involviment tal-istudenti fi proġetti ta’ riċerka marbuta mad-djalogu soċjali. Il-ftehim jipprevedi wkoll l-użu tal-Kampus tal-Università fil-Belt Valletta għal attivitajiet tal-MCESD, skont id-disponibbiltà u l-arranġamenti miftiehma.

Il-ftehim ġie ffirmat f’isem l-MCESD miċ-Chairperson, is-Sinjura Maria Micallef, u mill-Kap Eżekuttiv, Dr Brendan Zerafa, filwaqt li f’isem l-Università ta’ Malta ffirma r-Rettur, il-Professur Frank Bezzina. Il-Ministru  għall-Fondi Ewropej, id-Djalogu Soċjali u l-Protezzjoni tal-Konsumatu  Keith Azzopardi Tanti u l-Ministru għall-Edukazzjoni u l-Isport Byron Camilleri ppresedew l-iffirmaw.

MCESD and the University of Malta strengthen collaboration in research and social dialogue

The post L-MCESD u l-Università ta’ Malta jsaħħu l-kollaborazzjoni fir-riċerka u fid-djalogu soċjali. appeared first on MCESD.

Il-Kap Eżekuttiv tal-Aġenzija Identità, il-Kurunell Edric Zahra, u Graziella Cauchi minn Jobsplus taw rendikont tal-ewwel sena ta’ implimentazzjoni u spjegaw l-impatt tal-miżuri introdotti. Huma tkellmu dwar il-progress fl-istabbiltà fl-impjieg u l-konformità fis-suq tax-xogħol, kif ukoll dwar il-ħidma biex il-ħiliet tal-ħaddiema jiġu marbuta aktar mill-qrib mal-ħtiġijiet tas-suq, filwaqt li jissaħħu l-integrazzjoni u l-protezzjoni tagħhom.

Il-Ministru Jonathan Attard qal li l-ewwel sena ta’ implimentazzjoni kienet pożittiva. “Il-migrazzjoni tax-xogħol ma tistax tkun sempliċiment kwistjoni ta’ kemm għandna bżonn ħaddiema, iżda ta’ liema ħaddiema u liema ħiliet verament jeħtieġ il-pajjiż,” saħaq il-Ministru.

Il-Ministru Keith Azzopardi Tanti laqa’ r-rispons tal-imsieħba soċjali għall-progress li sar u enfasizza l-importanza tad-djalogu kontinwu sabiex il-politika tibqa’ tiġi aġġornata skont il-ħtiġijiet tal-lum u tal-futur.

Iċ-Chairperson tal-MCESD, Maria Micallef, qalet li “kien hemm qbil unanimu li din il-politika tmexxiet tajjeb u diġà qed tħalli benefiċċji, filwaqt li ġie rikonoxxut li għad hemm lok għal titjib.”

L-imsieħba ddiskutew ukoll l-evalwazzjoni tal-miżuri eżistenti u l-passi li jmiss fl-iżvilupp tal-politika. L-MCESD se jkompli joffri spazju għad-djalogu bejn il-Gvern u l-imsieħba soċjali sabiex il-politika tibqa’ tirrifletti l-ħtiġijiet tas-suq tax-xogħol.

Ritratti:

The post L-Imsieħba Soċjali jiddiskutu l-ewwel sena tal-Labour Migration Policy appeared first on MCESD.

Il-laqgħa, li saret fit-18 ta’ Settembru 2026 fil-Kampus tal-Belt Valletta tal-Università ta’ Malta, inkludiet interventi introduttorji miċ-Chairperson tal-MCESD Maria Micallef u mill-Ministru għall-Fondi Ewropej, id-Djalogu Soċjali u l-Protezzjoni tal-Konsumatur, l-Onor. Keith Azzopardi Tanti. Saret ukoll preżentazzjoni mis-Sinjura Maria Elena Despott, Kap tar-Rappreżentanza tal-Kummissjoni Ewropea f’Malta, segwita minn reazzjonijiet u diskussjoni mal-imsieħba soċjali.

Il-preżentazzjoni tat ħarsa ġenerali lejn il-prestazzjoni ekonomika ta’ Malta, filwaqt li enfasizzat tkabbir fil-Prodott Domestiku Gross (PDG) ta’ 4.0% fl-2025, bi tkabbir imbassar ta’ 3.7% fl-2026. Ġie nnutat ukoll it-tkabbir kontinwu fl-impjiegi, flimkien mal-isfidi relatati man-nuqqas ta’ ħaddiema u ta’ ħiliet.

Is-Sinjura Maria Elena Despott, Kap tar-Rappreżentanza tal-Kummissjoni Ewropea f’Malta, qalet “id-Diskors dwar l-Istat tal-Unjoni tal-President Ursula von der Leyen ippreżenta l-viżjoni u l-azzjonijiet konkreti għas-sena li ġejja sabiex jiġu indirizzati l-ħtiġijiet taċ-ċittadini u n-negozji Ewropej. Il-prijoritajiet imħabbra huma partikolarment rilevanti għal Malta, fosthom il-kompetittività, it-tlestija tas-Suq Uniku, is-simplifikazzjoni tar-regoli, it-titjib tal-aċċess għall-kapital u l-ħolqien ta’ impjiegi ta’ kwalità ogħla.”

Hija żiedet li l-isfidi, mill-intelliġenza artifiċjali sat-tibdil fil-klima, jippreżentaw ukoll opportunitajiet għaċ-ċittadini u n-negozji, filwaqt li enfasizzat l-importanza tar-rakkomandazzjonijiet tas-Semestru Ewropew fit-tisħiħ tal-kompetittività ta’ Malta.

X’ġie diskuss waq din il-laqgħa, iċ-Chairperson tal-MCESD Maria Micallef qalet li “iffukajna fuq żewġ oqsma importanti: id-Diskors dwar l-Istat tal-Unjoni tal-President Ursula von der Leyen, li spjega l-prijoritajiet tal-UE għas-sena li ġejja, u r-Rapport tal-Pajjiż għal Malta fi ħdan is-Semestru Ewropew. Filwaqt li ċ-ċifri ekonomiċi juru li Malta qed tkompli miexja f’direzzjoni pożittiva kif ukoll li ddiskutejna s-sitt oqsma identifikati permezz tar-rakkomandazzjonijiet tal-UE li fuqhom Malta jeħtieġ li tkompli tiffoka.”

Il-laqgħa eżaminat is-sitt oqsma koperti mir-Rakkomandazzjonijiet Speċifiċi għall-Pajjiż għal Malta għall-2026 u l-2027: il-politika fiskali, it-tassazzjoni u l-pensjonijiet; il-fondi tal-UE; ir-riċerka u l-innovazzjoni u s-sistema tal-ġustizzja; l-enerġija u t-trasport; l-immaniġġjar tal-iskart u l-ilma; u l-edukazzjoni, il-ħiliet u l-kwalità tal-impjiegi.

Id-diskussjoni tat lill-imsieħba soċjali l-opportunità li jaqsmu l-fehmiet tagħhom dwar ir-rakkomandazzjonijiet u l-implikazzjonijiet tagħhom għall-iżvilupp ekonomiku u soċjali ta’ Malta.

Ritratti:

The post L-MCESD jiddiskuti l-prijoritajiet Ewropej u r-rakkomandazzjonijiet għal Malta appeared first on MCESD.