{"id":5945,"date":"2024-03-04T16:11:44","date_gmt":"2024-03-04T15:11:44","guid":{"rendered":"https:\/\/mcesd.org.mt\/?p=5945"},"modified":"2024-03-05T09:06:20","modified_gmt":"2024-03-05T08:06:20","slug":"l-mcesd-jiltaqa-mal-isqfijiet-maltin-ghal-djalogu-fuq-kif-tista-titjib-il-qaghda-tas-socjeta-maltija","status":"publish","type":"post","link":"https:\/\/mcesd.org.mt\/mt\/l-mcesd-jiltaqa-mal-isqfijiet-maltin-ghal-djalogu-fuq-kif-tista-titjib-il-qaghda-tas-socjeta-maltija\/","title":{"rendered":"L-MCESD Jiltaqa\u2019 mal-Isqfijiet Maltin g\u0127al Djalogu fuq kif tista\u2019 Titjieb il-Qag\u0127da tas-So\u010bjet\u00e0 Maltija."},"content":{"rendered":"

L-Isqfijiet ta\u2019 Malta ltaqg\u0127u mal-Imsie\u0127ba So\u010bjali tal-MCESD u ddiskutew l-ekonomija u l-qag\u0127da tas-so\u010bjet\u00e0 Maltija sabiex isir titjieb fil-kwalit\u00e0 tal-\u0127ajja ta\u010b-\u010bittadini Maltin u G\u0127awdxin. Il-laqg\u0127a, ippreseduta mi\u010b-Chairperson tal-MCESD, il-Perit David Xuereb, saret fil-Kurja tal-Ar\u010bisqof bil-parte\u010bipazzjoni tal-Ar\u010bisqof ta\u2019 Malta Charles Scicluna, l-Isqof Aw\u017ciljarju Joseph Galea-Curmi, is-Segretarju Parlamentari g\u0127ad-Djalogu So\u010bjali, l-Onor. Andy Ellul, flimkien ma\u2019 membri tal-Kummissjoni \u0120ustizzja u Pa\u010bi.<\/a><\/p>\n

Fil-laqg\u0127a, il-Kummissjoni \u0120ustizzja u Pa\u010bi spjegat li l-irwol tag\u0127ha hu li tg\u0127in fl-i\u017cvilupp tal-kuxjenza so\u010bjali tal-pajji\u017c permezz tat-tag\u0127lim so\u010bjali tal-Knisja. Il-President tal-Kummissjoni, Daniel Darmanin, semma kif f\u2019dawn l-a\u0127\u0127ar snin il-Kummissjoni \u0127admet fuq pro\u0121etti b\u0127al \u2018Beyond GDP\u2019<\/span>, li jitratta s-sostenibbilt\u00e0 ambjentali kif ukoll fuq ir-ri\u010berka \u2018Ejja Ejja Culture\u2019<\/span> li kienet fuq is-sa\u0127\u0127a u s-sigurt\u00e0 tal-\u0127addiema fis-settur tal-kostruzzjoni f\u2019pajji\u017cna. Huwa tkellem ukoll dwar kwistjonijiet li jolqtu direttament li\u010b-\u010bittadini, fosthom id-d\u0127ul finanzjarju, l-affordabbilt\u00e0 tad-djar, il-kwalit\u00e0 tal-impjiegi, il-kura tas-sa\u0127\u0127a u l-edukazzjoni. Il-Kummissjoni \u0120ustizzja u Pa\u010bi tenniet l-impenn tag\u0127ha sabiex f\u2019isem il-Knisja ta\u0127dem mal-imsie\u0127ba so\u010bjali u entitajiet governattivi u ji\u0121u indirizzati dawn l-isfidi.<\/p>\n

L-Ar\u010bisqof Charles Scicluna sa\u0127aq li min imexxi u jdawwar l-ekonomija tal-pajji\u017c g\u0127andu r-responsabbilt\u00e0 ja\u0127dem g\u0127al o\u0121\u0121ettivi li j\u0127arsu fit-tul biex jipprote\u0121u l-\u0121enerazzjonijiet li \u0121ejjin. \u201cB\u0127ala pajji\u017c ikkonfermajna l-g\u0127a\u017cla, g\u0127alkemm kontra l-kurrenti kollha attwali, li nirrispettaw il-\u0127ajja tal-bniedem mill-bidu nett, mit-tnissil. B\u2019din id-de\u010bi\u017cjoni qed ng\u0127idu lill-\u0121enerazzjonijiet futuri tag\u0127na li huma milqug\u0127in u li se jikbru f\u2019ambjent li jilqag\u0127hom u jipprote\u0121ihom. Dan hu kontribut importanti tas-so\u010bjet\u00e0 tag\u0127na, u turija \u010bara tal-valur tal-\u0127niena mal-proxxmu tag\u0127na.\u201d<\/em><\/p>\n

Fakkar ukoll li l-Istat mhuwiex mag\u0127mul mill-partit politiku li qed jiggverna i\u017cda mi\u010b-\u010bittadini kollha. \u201cIrridu ni\u017cviluppaw i\u017cjed dak li t-Taljani jsej\u0127ulu \u2018il senso dello stato\u2019 g\u0127aliex b\u0127ala poplu g\u0127ad g\u0127andna mentalit\u00e0 kolonjali fl-im\u0121iba tag\u0127na ma\u2019 xulxin.\u201d<\/em><\/p>\n

L-Ar\u010bisqof appella wkoll sabiex fid-de\u010bi\u017cjonijiet tag\u0127na ma ninsewx fil-barranin li qed jg\u0127ixu f\u2019Malta, li m\u2019g\u0127andhomx ikunu \u010bittadini tat-tieni klassi. Sa\u0127aq li hu d-dover tag\u0127na nirrikonoxxu l-kontribut siewi li qed jag\u0127tu lill-pajji\u017c u nilqg\u0127uhom fis-so\u010bjet\u00e0 tag\u0127na. Il-Knisja f\u2019Malta, qal l-Ar\u010bisqof, qed tag\u0127mel \u0127ilitha biex permezz tas-sa\u010berdoti u l-persuni laj\u010bi tkun pre\u017centi mal-komunitajiet barranin, b\u2019mod partikolari mal-Insara li qed jg\u0127ixu mag\u0127na.<\/p>\n

Is-Segretarju Parlamentari g\u0127ad-Djalogu So\u010bjali, l-Onor. Andy Ellul wera s-sodisfazzjon tieg\u0127u g\u0127at-tema li \u0121iet diskussa waqt din il-laqg\u0127a tal-MCESD li trattat, fost l-o\u0127rajn, id-dinjit\u00e0 tal-\u0127addiema. L-Onor. Ellul tenna li d-djalogu so\u010bjali jista\u2019 jwassal biex, b\u2019mod konkret, kif di\u0121\u00e0 qed isir, tin\u0127oloq bidla fil-\u0127ajja tan-nies. Huwa semma kif bl-introduzzjoni tal-li\u0121i li tirregola l-\u0127addiema tal-platform work, ing\u0127ataw dinjit\u00e0 b\u2019kundizzjonijiet ta\u2019 xog\u0127ol a\u0127jar u pagi iktar di\u010benti. L-Onor. Ellul semma wkoll li bis-sa\u0127\u0127a ta\u2019 politika ta\u2019 perswa\u017cjoni, intla\u0127aq ftehim storiku li permezz tieg\u0127u \u017cdiedet il-paga minimina b\u2019\u20ac21 fil-\u0121img\u0127a. Ellul spegja wkoll li l-li\u0121i tat-temping agencies se tkun ukoll qed tag\u0127ti dinjit\u00e0 lill-\u0127addiema li ja\u0127dmu mal-a\u0121enziji tax-xog\u0127ol, kemm Maltin kif ukoll barranin.<\/p>\n

Is-Segretarju Parlamentari Ellul sa\u0127aq li: \u201cImiss issa li n\u0127ares \u2019il quddiem biex nara l-kun\u010bett ta\u2019 \u2018equal pay for work of equal value\u2019 jid\u0127ol fis-se\u0127\u0127, fejn \u0127addiema ta\u2019 a\u0121enziji tax-xog\u0127ol jibdew jit\u0127allsu g\u0127all-istess xog\u0127ol, daqs \u0127addiema li jkunu impjegati mal-kumpanija fejn ikun qieg\u0127ed isir ix-xog\u0127ol\u201d.<\/em> Huwa nnota b\u2019sodisfazzjon li l-Knisja f\u2019Malta taqbel ma\u2019 dan il-kun\u010bett, li \u017cgur se jkun qed isa\u0127\u0127a\u0127 id-dinjit\u00e0 tal-\u0127addiema.<\/p>\n

L-Imsie\u0127ba So\u010bjali laqg\u0127u dawn l-inizjattivi u enfasizzaw l-importanza ta\u2019 politiki inklu\u017civi li jibbenefikaw minnhom is-setturi kollha tas-so\u010bjet\u00e0. Id-diskussjonijiet tal-Imsie\u0127ba So\u010bjali inkludew sfidi b\u0127all-affordabbilt\u00e0 tad-djar, l-inflazzjoni, it-tkabbir tal-popolazzjoni, il-preservazzjoni tal-valuri tal-familja, l-etika tax-xog\u0127ol u iktar sigurt\u00e0 u infurzar fil-pajji\u017c. Il-Kumitat tas-So\u010bjet\u00e0 \u010aivili indirizza sfidi tas-so\u010bjet\u00e0 inklu\u017ci kwistjonijiet relatati mad-droga, filwaqt li l-Kumitat Re\u0121jonali g\u0127al G\u0127awdex enfasizza t\u0127assib spe\u010bifiku li jaffettwa l-G\u0127awdex, b\u0127all-konservazzjoni ambjentali u l-i\u017cvilupp sostenibbli.<\/p>\n

L-MCESD<\/strong> enfasizza li l-Ar\u010bidjo\u010besi ta\u2019 Malta<\/a> g\u0127andha rwol importanti ferm fit-trawwim tad-djalogu so\u010bjali. Il-\u0127idma tal-MCESD permezz tad-djalogu kontinwu mal-Knisja u mal-entitajiet tag\u0127ha huma meqjusa essenzjali biex ji\u0121u indirizzati l-isfidi ekonomi\u010bi u so\u010bjali ta\u2019 pajji\u017cna, u ji\u0121i \u017cgurat il-\u0127arsien tal-\u0121enerazzjonijiet futuri permezz ta\u2019 politiki u \u017cvilupp sostenibbli.<\/p>\n